༢༠༡༢འཛམ་གླེང་དུས་མཐའ།
ལོ་ལྔའི་གོང་"2012འཛམ་གླེང་དུས་མཐའི་ཉིན་མོ།"ཡིན་པའི་འུར་སྐད་ཟིང་ཟིང་དུ་སྒྲོག་ནས་མི་སེམས་ཕུ་དཀྲུག་མདའ་དཀྲུག་དུ་བཏང་མྱོང་།འོན་ཀྱང་མཐའ་མར་དུས་ཚོད་ཀྱི་བདེན་དཔང་ལས་དོན་དེ་ནི་རང་གི་རང་ལ་འཇིགས་སྣང་སྐུལ་བའི་དགོད་བྲོའི་དཀྲོག་གཏམ་ཞིག་ཏུ་འགྱུར་བ་རེད།།
ཡང་དེ་རི་ཁོ་བོས་གློ་བུར་དུ་"2032འཛམ་གླེང་དུས་མཐའི་ཉིན་མོ་"ཡིན་ཟེར་བའི་རྩོམ་ཐུང་ཞིག་བྲིས་ན།ཁྱེད་ཀྱི་ང་བྱིས་པ་ལོ་བརྒྱད་མིན་པས་སྨྱོ་གཏམ་དང་ལབ་འཆོལ་འོག་མགོ་སྐོར་མ་ཚུད་ཟེར་ཞིང་།གཏན་ནས་ཡིད་ཆེས་ངེས་མ་རེད།ཡིན་ནའང་འདི་དང་འདི་འདྲ་བའི་མ་འོང་པའི་ཉིན་ག་གེ་མོ་འཛམ་གླེང་དུས་མཐའི་ཉིན་མོ་ཡིན་པའི་མངོན་དཔག་ལུང་བསྟན་གྱི་གོ་བརྡའི་དཔྱད་རྩོམ་རྒྱུན་མ་ཆད་པར་དྲ་ཐོག་སྟེང་སྤེལ་དང་སྤེལ་བཞིན་ཡོད་པ་ཡིན།།
ཧའོ་ཁིན། HawKing
དེ་ཡང་ལྟ་བ་འདིའི་འཁྱབ་ཁུངས་ཐོག་མ་ནི་དབྱིན་ཇིའི་སྐྱེ་དངོས་རིག་པ་མཁས་ཅན་ཧའོ་ཁིན་(HawKing)བསྐལ་པ་འཇིག་ཚུལ་སྨྲ་བའི་གནས་ལུགས་ཕྱོགས་སུ་ལངས་ཏེ།ཐེངས་གཅིག་གཉིས་མིན་པར་མི་རྣམས་ལ་2032འཛམ་གླེང་དུས་མཐའི་ཉིན་མོ་ཡིན་པའི་མངོན་བརྡ་བཏང་བ་ལས་བྱུང་།ཧའོ་ཁིན་གྱིས་དེ་ལྟར་གསུངས་པ་ལ་ཡང་རྒྱུ་མཚན་དང་གཞི་ཁུངས་མེད་པ་མིན་པར།མཚན་རིག་པ་མང་དག་གཅིག་གིས་ཀྱང་དེ་འདྲ་བའི་འཇིག་རྟེན་བསྐལ་རྫོགས་ཀྱི་མངོན་དཔག་ལྟ་བ་གླེང་བ་ཡིན།།
དེ་ལས་ཀྱང་ཁུངས་བཙུན་པར་བརྗོད་ན་ཡུག་རེན་(Ukraine)གྱི་གནམ་རིག་མཁས་ཅན་ཞིག་གིས།ལོ་གོང་མའི་ཟླ་བ་9པའི་ཚེས་16ཉིན་ཉི་མའི་ཁྱིམ་རྒྱུད་ཀྱི་རྒྱུ་སྐར་ཆུང་ཆུང་ཞིག་སའི་གོ་ལ་དང་དཔུང་བརྡར་དུ་སོང་བར་བཤད་ཞིང་།སྐབས་དེ་དུས་གོ་ལ་གཉིས་དབར་བར་ཐག་སྤྱི་ལེ་ཁྲི་670ལས་མེད་པ་དང་དབྱེ་ཞིབ་བྱས་པ་ལྟར་ན།ཉེན་ཁ་ཆེ་བའི་རྒྱུ་སྐར་ཆུ་ཆུང་དེ་བསྐྱར་ལོག་འོང་ནས།གཏག་གཏག་2032ལོའི་ཟླ་བ་8པའི་ཚེས་26ཉིན་རྒྱུ་སྐར་ཆུང་ཆུང་དེ་དང་ས་གོ་ལའི་བར་རྫ་དྲག་གི་བརྡེབ་རྡུངས་ཞིག་ཡོང་བར་བཤད་པས།བརྡེབ་རྡུངས་དེས་སའི་གོ་ལའི་ཐོར་གཞིག་དུ་འགྲོ་བ་དང་འཛམ་གླེང་ནུབ་སོང་བར་བཤད་པ་ཡིན།།
གཅིག་བྱས་ན་ཧའོ་ཁིན་དང་མཚན་རིག་པ་དེ་ཚོས་བཤད་པའི་མངོན་དཔག་ལྟ་བ་འདི་ཡང་དཀྲོག་གཏམ་ཞིག་ཡིན་སྲིད་ལ།ཡང་གོ་བརྡ་ཞིག་ཀྱང་ཡིན་ངེས།འོན་ཀྱང་ང་ཚོ་མའི་རིགས་ཀྱིས་གོ་ལ་འདིར་སྦགས་བཙོག་ག་ཚོད་དང་གྲེག་བཅོད་ག་ཚོད་བཏང་ཡོད།ད་དུང་མུ་ཐུད་ནས་འདི་ལྟར་ཡིན་ན་མི་རིང་བའི་ལོ་བརྒྱའི་ནང་སའི་གོ་ལ་འཇིག་ཉེན་ཆེ་བའི་མངོན་དཔག་ངས་ཀྱང་བཤད་པར་སྤོབས་པ་ཡིན།།
འཇུག་ཏུ་གསལ་བརྗོད་——ངས་རྩོམ་ཐུང་འདི་བྲིས་རྗེས།མི་སེམས་ལ་འཇིགས་སྣང་སྐུལ་བ་མིན་པར།ང་ཚོས་མ་ཡུམ་གོ་ལ་ལ་བདག་སྐྱོང་དང་རང་བྱུང་ཁོར་ཡུག་ལ་སྲུང་སྐྱོབ་བྱེད་པར་རེ་སྐུལ་བྱེད་པ་ཡིན་ནོ།།
网友评论